Drejtori i spitalit të Strugës Mentor Ibrahimi thotë se problemi më serioz me të cilin përballet spitali, është instalimi i vjetruar elektrik. Për shkak të mbingarkimit të sistemit që është rezultat i numrit më të madh të pacientëve dhe aparateve të reja siç thotë ai, duhet të bëhet diçka që të mos përsëritet ajo që ndodhi para disa ditësh, kur u ndërpre energjia elektrike në rrethin e spitalit.
Ibrahimi shton se gjatë ndërprerjes së energjisë elektrike nuk është anuluar asnjë intervenim, kurse në repartet e spitalit ka pasur energji elektrike. Lidhur me vitin e ardhshëm konsideron se mjetet e parashikuara buxhetore nuk do ti mjaftojnë spitalit për funksionimin normal në kushte kur vëllimi i punës ishte rritur madje për 100 për qind për shkak të renovimit të spitalit në Ohër. Zëdhënësi i Fondit të shëndetësisë, Branko Axhigogov tha për Alsat M se për shkak të gjendjes së sapokrijuar buxheti i spitalit të Strugës për vitin 2010 tash më ishte rritur për 6 milion denar dhe mohon se vitin e ardhshëm do të ketë më pak mjete për spitalin. Nëse do të ketë kërkesë, porosit ai, drejtori Ibrahimi le të vij për të biseduar në fond.
